Mîrza Bekir bal kişand ser girîngiya tifaqa navxweyî ya Êzidiyan û diyar kir ku ji her tiştî girîngtir yekitî ye. Bekir der barê metirsiyên li ser herêmê û pêwistiya hevgirtinê de wiha got: “Pêwiste em dersê ji fermana sala 2014’an derxin û rê nedin ku careke din ew karesat dubare bibe.”

 

Bekir destnîşan kir ku niha bi deh hezaran hêzên çekdar ên Êzidiyan hene û ev hêz bûn sedem ku civaka Êzidî bigihîje van rojan û got: ‘’Divê em wek çavên xwe li van hêzan xwedî derkevin. Êdî dem hatiye ku her kes nêrînên xwe yên siyasî deyne aliyekî û li Êzdayetiya xwe xwedî derkeve.”

 

Mîrza Bekir anî ziman ku wek serokêşîrên herêmê ew di nava hewildaneke mezin de ne da ku tifaqa Êzidiyan di demeke nêz de ava bibe. Bekir destnîşan kir ku helwesta hemû serokêşîran di civînan de erênî ye û wiha dawî li axaftina xwe anî: “Ji bo pûçkirina hemû planên li ser Şengalê, pêwiste rojek beriya rojekê hêzên me yên leşkerî di bin sîwanekê de bibin yek û parastina axa xwe misoger bikin.”