Endamê Grup Yorumê Cem Dursun û girtiyê bi navê Tacettîn Erol Şahîn ku li Girtîgeha Hejmar 6 a Tîpa L a Marmarayê tên ragirtin, li dijî tecrîd, zext û sepanên îşkenceyê di 29’ê Nîsanê de dest bi çalakiya greva birçîbûnê ya bêdem kir. Parêzerê girtiyan Naîm Emînoglû, diyar kir ku vîtamînên B û B12 nadin girtiyan, tenê rojê 2 saetan derdixînin hewşê û girtî di hucreyan de tên ragirtin. 

 

Emînoglû, diyar kir ku demekî dirêj e li girtîgehan binpêkirin didomin û ev tişt anî ziman: “Bi kamerayên li qawîşan hatin bicihkirin re jiyana taybet a girtiyan tê binpêkirin. Girtiyan jî ev kamera girtin û bêyî der heqê wan de lêpirsîna disiplînê hebe bi keyfî xistin hucreyê. Girtiyan jî li dijî vê greva birçîbûnê dan destpêkirin.” 

 

 ‘WEZARETA DADÊ VAN BINPÊKIRINAN PAŞGUH DIKE’   

 

Emînoglû, diyar kir ku sepana du saetan a derketina hewşê li dijî hiqûqê ye û axaftina xwe wiha qedand: “Ji ber ku di qanûnan de tê gotin ku ji kêliya roj hil tê heta ava dibe mafê girtiyan heye ku li hewşê bin. Lê ev sepan niha veguheriye tecrîdê. Beriya niha du kes di greva birçîbûnê de bûn. Me têkildarî van serî li Wezareta Dadê da. Me jê re got ku sepanên derhiqûqî hene û pirsa ‘hûn li gorî kîjan rêziknameyê vê dikin’ jê kir. Lê wezaretê tu bersivek neda me. Wezaret, van sepanan jinedîtî ve tê. Heta ku binpêkirinên mafan bi dawî dibin em ê têkoşîna xwe bidomînin.”