Meclisa Dayikên Aştiyê, bi boneya Roja Dayikan, têkildarî hevdîtinên li Enqereyê bi nûnerên partiyên CHP, DEVA, Gelecek, MHP, AKP û Saadetê re daxuyaniyeke nivîskî weşand. Di daxuyaniyê de hate ragihandin ku hevdîtin ji bo Pêvajoya Aştî û Civaka Demokratîk girîng û cihê hêviyê bûn.

 

Daxuyanî wiha ye: 

 

“Em wek Dayikên Aştiyê, bi boneya Roja Dayikan di serdanên xwe de spasiya CHP, Partiya DEVA, Partiya Gelecek, MHP, AK Parti û Partiya Saadetê dikin ku guh dane daxwaza aştiyê ya jin û dayikan, bi dilgermî em pêşwazî kirin û deriyê diyalogê vekirî hiştin.

 

DAXWAZÊN DAYIKAN

 

Em bawer dikin ku hevdîtinên me ji bo pêvajoya Aştî û Civaka Demokratîk girîng û bi hêvî derbas bûne. Daxwazên me yên bingehîn ên ku me di dema hevdîtinan de anîne ziman ev in; avêtina gavên siyasî û hiqûqî. Destpêkirina ‘mafê hêviyê’ (derfeta berdana bi şert) ji bo Abdullah Ocalan ku di girtîgehê de ye; me ev wekî mecbûriyeke hiqûqî û parçeyek ji pêvajoya aştiyê daxwaz kir. Avakirina pêşerojeke demokratîk ku êdî tu dayik negrîn, tu ciwan nekevin binê axê û gel di jiyaneke wekhev, azad û bi rûmet de bigihêjin hev. Em wek dayik difikirin ku aştiyeke birûmet û mayînde ne tenê ji bo herêmekê, ji bo 86 milyon mirovên ku li Tirkiyeyê dijîn nebenabî ye.

 

EM DIXWAZIN RÊYÊN DIYALOGÊ BÊN VEKIRIN

 

Wek dayikên ku bi salan e êşên polîtîkayên şer kişandine, bi êşa keç û kurên xwe hatine cezakirin lê dest ji jiyan û aştiyê bernedane; em dixwazin rêyên diyalogê bên vekirin, zemîna çareseriya demokratîk xurttir bibe û astengiyên li pêşiya rêyên hevdîtinê bên rakirin. Di dema ber bi Roja Dayikan de, hestiyarî û îradeya çareseriyê ya ku me ji beşên cuda yên civakê dît, di dilê me dayikan de bûye hêvî.

 

Em jin û dayik dizanin ku şer herî zêde birînê di jiyana jinan de vedike. Ji ber vê yekê parastina aştiyê, di heman demê de parastina jiyan, wekhevî û pêşeroja azad e. Em bawer dikin ku têkoşîna ku bi keda jinan û bi biryardariya dayikan a ji bo aştiyê mezin dibe, dê ji bo jiyana hevpar a gelan zemîneke bi hêz ava bike.

 

DAXWAZA HEVDÎTINÊ 

 

Di vê çarçoveyê de me di hevdîtinan de diyar kir ku daxwazên me yên hevdîtina bi birêz serokkomar, birêz Devlet Bahçelî û Birêz Abdullah Ocalan re hîn jî derbasdar e. Em dayik, ji bo pêşketina aştî û çareseriyê, daxwaza vekirina rêyên hevdîtinê û xurtkirina zemînên diyalogê dikin. Di vê pêvajoyê de em spasiya DEM Partiyê û her kesê ku keda wan heye dikin ku em bi tenê nehiştin, piştgiriya me mezin kirin û di pêkhatina hevdîtinan de roleke hêsankar lîstin.

 

Em wek Dayikên Aştiyê; dê li dijî şer jiyanê, li dijî înkarê rastiyê û li dijî tunnehesibandinê biratiya gelan biparêzin. Em baweriya xwe ya ku civaka demokratîk û aştiya birûmet dê bi pêşengiya jinan mezintir bibe, diparêzin. Jin, jiyan, azadî. "