Çalakiya protrestokirina qeyûm a li pêşiya Şaredariya Bajarê Mezin a Mêrdînê didome. Hevşaredara Amedê Serra Bucak û şandeya pê re tev li çalakiyê bûn. Li vir bi tevlibûna Hevşaredarên Bajarê Mezin a Mêrdînê Ahmet Turk û Devrîm Demîr daxuyanî hate dayin. 

 

AHMET TURK: BIRYAREKE SIYASÎ YE

 

Hevşaredar Ahmet Turk got ku dê gel berteka xwe ya li dijî qeyûman nîşan bide. Turk, da zanîn ku axaftina wî ya di sala 2011’an de li Sêrtê kiriye weke hinceta tayînkirina qeyûm hatiye nîşandan û lê di vê dozê de biryara neşopandinê hatiye dayin. Turk, bi domdarî ev tişt anî ziman: “Bi ser re 10 sal derbas bûne û biryara neşopandinê betal dikin û dixwazin dîsa bidarizînin. Belê bi ser re 13 sal derbas bûne. Anku divê ji ber demborînê ev doz betal bibe lê bi vî awayî tê domandin. A din jî Doza Kobanê heye. Pêvajo didome. Jixwe dema ez bûm namzet, Doza Kobanê hebû. Anku ji nişka ve derneket holê. Ji bo xespkirina îradeya gel hinek hincet nîşan dane û dixwazin peyamê bidin raya giştî. Tevek jî derew in, bêhiqûqî ne û bêedaletî ne.” 

 

Bi domdarî Turk, destnîşan kir ku di lêpirsîna derheqê wî de li Mêrdînê hatiye vekirin de jî biryara neşopandinê hatiye dayin û wiha pê de çû: “Darazê biryara neşopandinê daye. Weke din tu dozên me tune ne. Vê her tim bi kar tînin. Îcar dozên min di demên berê de jê beraet kirine weke hincet nîşan didin. Weke encam, biryareke siyasî ye. Dixwazin gel bêzar bikin û bêdeng bikin. Divê her kes vê bibîne.” 

 

BUCAK: EM Ê DEV JI TÊKOŞÎNÊ BERNEDIN

 

Hevşaredara Bajarê Mezin a Amedê Serrra Bucak jî bi bîr xist ku ev 3 serdemin li şaredariyên gelê kurd tên desteserkirin. Bucak, gelê kurd li cem îradeya xwe cih digire û dê tu caran dev ji têkoşîna xwe bernede. Bucak, wiha domand: “Tenê gel dikare kesên hilbijartî ji peywirê bigirin. Ya ku hûn dikin derhiqûqî ye, derqanûnî ye. Em ê li dijî xespkirina îradeyê bisekinin. Ji ber piştevaniyê spasiya CHP’ê dikim lê ev bes nake. Divê em mil bidin milê hev û vê berxwedanê mezin bikin. Îktîdar çima ewqas bêtehemûl e? Ji ber ku çavkaniyên wan qut bûn. Ji ber ku pêşî li ranta we hate girtin. Lê îrade û hêviya gel ji ranta we mezintir e û dê vê rantê binax bike.” 

 

DEMÎR: DIVÊ EM DENGÊ XWE BILIND BIKIN

 

Hevşaredara Bajarê Mezin a Mêrdînê Devrîm Demîr jî destnîşan kir ku li îradeya gel qeyûm hatiye tayînkirin. Demîr, da zanîn ku dê têkoşîna wan bidome û wiha got: “Mîna duh îro jî dê berxwedana me ya li dijî kesên îradeya me nas nakin bidome. Heke em bi eşkereyî bibêjin; qeyûm Tuncay Akkoyun xwe ji bo vê rojê amade kr. Hemû pratîk û nêzikatiyên wî ji bo vê rojê bûn. Bi dijminane nêzî hemû rêxistinên li bajar û siyaseta demokratîk bû. Em îro jî bi wêneyek wiha re rû bi rû ne. Îro dîsa îradeya gel nas nekirin û desteser kirin. Em bangî raya giştî dikin; heke pêşiya vê tarîtiyê neyê girtin sibe dê hêj tarîtir bibe. Banga me ji bo hêzên demokrasiyê ye; divê li dijî vê polîtîkayê derkevin. Li dijî siyaseta rizî em dengê xwe derxînin. Em ê paşvegavê neavêjin û li ber xwe bidin.”