Hevşaredarên Bajarê Mezin Serra Bucak û Dogan Hatun, ji bo entegrasyona Otobusên Gel ên Taybet, qeydkirina veguhestina giştî, parastina hevsengiya dabîn-daxwazê, zêdekirina karîgerî û kalîte di xizmetên veguhestina giştî de, zêdekirina memnûniyeta welatiyên li bajêr dijîn an jî seyahet dikin, zêdekirina standardên karûbarî, ji bo afirandina karûbarê hatûçûneke giştî ya nûjen û bi bandor û berfirehkirina Pergala Berhevkirina Xerca Elektronîkî, S.S. Otobusên Taybet ên Gel ên Diyarbekirê yên Hejmar 53, bi Kooperatîfa Veguhestina Rêwiyan re protokol îmze kir.

 

Li Şaredariya Bajarê Mezin merasîma îmzekirina protokolê hat lidarxistin. Beriya girêbestê bi nûnerên kooperatîfan re civîneke kin hat lidarxistin, hevserok Serra Bucak û Dogan Hatun diyar kir ku divê kooperatîf erkên veguhastinê yên bajêr zêdetir bixin rojevê. Protokola ku piştî hevdîtinê hat amadekirin ji aliyê Hevşaredar Serra Bucak û Kooperatîfa Veguhestina Rêwiyan a Otobusên Gel ên Taybet Mehmet Pervane ve hat îmzekirin.

 

DÊ MUAMELEYA XERAB A LI HEMBERÎ XWEDIYÊN QERTA BELAŞ BI DAWÎ BIBE

 

Li gorî protokolê, ji 01.01.2025an pê ve Şaredariya Bajarê Mezin dê ji bo rêwiyên ku bi Otobusên Gel siwar dibin û heta roja îro rastî muameleya xerab hatine, her siwariya bêpere pereyê piştgiriyê bide. Otobusên Gel ên Taybet dê bêyî pirsgirêk ji bo xwediyên qertên belaş û daxistinî veguheztina birêkûpêk peyda bikin. Mafên kesên ku ji xetên çûnûhatinê yên bêpere û bi erzanî sûd werdigirin dê bên parastin û ti pirsgirêk dernakeve. Qertên Aboneyê dê tenê li otobusên gel derbasdar bin.

 

DÊ BERHEVKIRINA PEREYAN BÊ RAKIRIN

 

Pereyên ku bi destan têne berhevkirin dê ji 1ê Rêbendanê pê ve ji bo Otobusên Gel yên Taybet bi tevahî were rakirin. Ger pereyê ku bi kesane hatiye komkirin were betalkirin, para ji sedî 7 ku wekî xercê xebitandinê ji heqê siwarbûna qertê ya hemwext tê daxistin, dê bibe ji sedî 5. Dema ku têkevin pergalek bi tevahî-bingeha qertê, dê kêmasiya kozikên dagirtina qertê ji holê bê rakirin, û cihên kozikên nû yên tijîkirinê dê bêne destnîşankirin û çalak kirin. Ji bo rêwiyan dema ku li wesayîtan siwar dibin nerehetiya rêwiyan çênebe dê pasên 2-rêwiyan ên yekcar werin derxistin.

 

DÊ DI CÎ DE MUDAXILEYÎ NEYÎNIYAN BÊ KIRIN

 

Ji bo ku pirsgirêkên çûnûhatina giştî ya li bajêr kêm bibin, dê lêkolînek bê kirin û bi mebesta ku hemî wesayîtên veguhestina giştî ji heman reng, heman celebî bin û bi hevahengî, bê pêşbazî, di bin banekî de tevbigerin. Dê komîsyonek ji 3 kesan ku ji nûnerên Zabite, Veguhastin û Kooperatîfê pêk tê bê avakirin û diyalog û reftarên neyînî yên ku dê di navbera rêwiyan û ajokar de li qadê rû bidin dê bi mudaxeleya guncav û di wextê de bê çareserkirin. Wekî din, ev komîsyon dê li gorî rewşê ji bo kiryara sûc, yekîneya têkildar, Midûriyeta Zabiteyan agahdar bike.

 

SÎSTEMA RAWESTGEHA BIAQIL

 

Şaredariya Bajarê Mezin a Amedê, ji bo ku li gor biryara UKOMEyê ya di 19.09.2007an de girêbestê girêbide, prensîbên bingehîn ên Pergala Hewza Hevbeş a ku Otobusên Gel yên Taybet jê re têkildar in, di veguheztina giştî de dê xebatên pêwîst bimeşîne, lê ji bilî vê jî dê pergala Hewza Rêyê bi cih bîne. Dê di veguheztina giştî ya bajarî de pergalek rawestgeha biaqil were danîn, û rawestgehên winda dê bêne temamkirin. Ger şaredarî cihekî guncav bibîne, dê li rawestgehên dawî ji bo ajokaran cihên bêhnvedanê yên pir-armanc bên çêkirin.

 

Hemû wesayîtên veguhestina giştî dê li gorî pergala demê kar bikin. Kooperatîfa Otobusên Gel a Taybet piştî saetên xebatê heta saet 24:00an dê li her rêyê herî kêm 5 wesayîtên nobetê bihêle dê karûbarên veguhestina giştî peyda bike. Dê der barê kesên ku tevnegerin de ceza bê dayîn.

 

AJOVANÊN JIN

 

Piştî ku dayîna pereyê di destan de di Wesayîtên Veguhastinê yên Gel de bi tevahî bê rakirin, dê îstîhdama ajokarên jin di Otobusên Gel de dest pê bike. Ji bo wergirtina şofêrên jin, piştî ku şaredarî û kooperatîf perwerdehiya hevpar bidin namzedên ajokar ên jin ên ku serlêdan kirine, ajokarên jin ên xwedî ehliyeta pola D (Kevn E) wê bi dayîna kotaya ji sedî 20'ê tevahiyê bixebitin.

 

Karmendên ku xizmetên veguhestina gelemperî pêşkêş dikin dê salê herî kêm 4 caran perwerdehiya hundirîn bibînin. Xercên perwerdehiyê dê ji aliyê Kooperatîfê ve bê dayîn. Ev semînerana dê mijarên zêdekirina karûbar û razîbûna rêwiyan û jêhatiya pîşeyî li xwe bigirin. Organîzasyona perwerdeyê dê ji aliyê Şaredariya Bajarê Mezin a Amedê ve bê kirin. Di encama van perwerdehiyê de dê sertîfîka û kartên şofêran ji bo karmendên ku karûbarên veguhestina giştî pêşkêş dikin werin dayîn. Kesên ku qerta şofêrê wan tune be, dê bikaranîna veguhestina gelemperî lê qedexe be.

 

Ger efserên kontrolê daxwaza betalkirina şofêrên otobusên gelemperî yên ku li gorî rêgezan tevnagerin û xelet tevdigerin, divê kooperatîf an jî endamên wê karûbarê karmendên têkildar biqedînin. Di vê rewşê de, xebatkarên ku karê wan bi dawî dibe, dê di ti wesayîteke veguhestina gelemperî de neyê xebitandin.

 

Di merasîma îmzekirina protokolê de, Sekreterê Giştî Emrullah Gorduk, Alîkarê Sekreterê Giştî Reşat Bakan û endamên meclîsê amade bûn.