NAVENDA NÛÇEYAN - Endama Meclisa Xweser a Şengalê Nafya Mêşo têkildarî kampanyaya ji bo piştgiriya bi Bakur û Rojhilatê Sûriyeyê re li Şengalê hatiye destpêkirin axivî û got: “Wan canê xwe ji bo me dan. Lewma civaka Êzidî çi ji dest bê dê ji bo Rojava bike.”
Heyet Tehrîr el-Şamê (HTŞ) di 27’ê Mijdarê de li dijî Helebê êriş da destpêkirin û dewleta tirk û koma wê ya paramîlîter SMO’yê jî bi awayekî hemwext dest bi êrişên ser Bakur û Rojhilatê Sûriyeyê kirin. Dewleta tirk û komên wê yên paramîlîter, di navbera 2-9’ê Kanûnê de zarok û jin jî di nav de 41 kes qetil kirin. Bi destpêkirina êrişan re gelek welatiyan ji xaka xwe koç kirin û ketin rêya koçberiyê. Rêveberiya Xweser a Şengalê ji bo piştgiriya bi gelên Bakur û Rojhilatê Sûriyeyê re, di 5’ê Kanûnê de dest bi kampanyaya alîkariyê kir. Kampanya hêj didome. Civaka Êzidî ku eleqeyeke mezin nişanî kampanyayê dide.
Endama Meclisa Rêveberiya Xweser a Şengalê Nefya Mêşo têkildarî kampanyayê ji Ajansa Mezopotamyayê (MA) re axivî.
'LI KU BERXWEDAN HEBE ÊRIŞÎ WIR DIKIN'
Nafya Mêşo, diyar kir ku şeniyên ji Efrînê koçber bûn rojên zor û zehmet derbas dikin û got ku li dijî êrişên qirkirinê pêwistî bi yêkitiyê heye. Nafya Mêşo, wiha domand: “Ez berxwedana Rojava pîroz dikim. Şereke gelek mezin li Efrînê çêbûbû. Ez bi xwe jî li Efrînê mabûm. Şerekî gelek dijwar li ser gelê me yê Efrînê hebû. Heta dawiyê jî li ber xwe dan. Li ku derê gelê me li berxwe bide li wir êriş dikin. Ew çeteyên DAIŞ'ê ku êrişî Şengalê kirin bi ser naveke din êriş birin ser Efrînê. Gelê me yê Efrînê ji wir koçber bû û hate Şehbayê. Lê dinêrin li ku derê gelê me li ber xwe bide bi şêwazên cuda êriş dikin. Naxwazin ku civaka me yêkitiya xwe çêbike û bi hêz bibe. Lê gelê me jî li dijî van êrişên qirkirinê bersiv dide wan. Piştî çend salan dîsa ji Şehbayê jî koçber kirin. Bi şêwazeke ne mirovane êrişî gelê me dikin.”
'WAN CANÊ XWE JI BO ME DAN'
Bi domdarî Nafya Mêşo bi lêv kir ku gelê Rojava ji bo Şengalê her alîkariyek kir û ji ber wê jî divê ku herî zêde Êzidî li wan xwedî derbikevin. Nafya Mêşo, wiha dirêjî da axaftina xwe: “Niha jî Şehbayê jî koçber bûne û Tirbesbiyê û Amûdê bicih bûne. Em weke civaka Êzidî her tim piştgiriya gelê xwe dikin. Dema ku êrişî Efrînê kirin wê demê de jî me hevkariya gelê xwe kir. Em niha jî dixwazin ku alîkariya gelê xwe bikin. Em bi ruh û can bi wan re ne. Heke ku rê bidin me û pêwîst bike em ê biçin wê derê û birînên wan bipêçin. Em niha ji bo jinan, zarokan, ciwanan û extiyaran kincan kom dikin. Her wiha firaqan, xurekan kom dikin. Gel eleqeyeke mezin nîşanî vê kampanyayê dide. Civaka Êzidî vê alîkariyê weke deyneke ku li ser milê xwe dibîne û bi vê hişmendiyê tev li kampanyayê dibe. Em îro çi bikin jî em nikarin wî deynî bidin. Heke ku me kariba em ê ji malên xwe derketiban û malên xwe jî bidana. Tu tişt bi qasî ruhê mirovî şirîntir nîne lê wan canê xwe ji bo me dan. Em bo wan çi bikin jî kêm e.”
'DIVÊ ÊZIDÎ XWEDÎ LI WAN DERKEVIN'
Di berdewama axaftina xwe de Nafya Mêşo anî ziman ku xwedîderketina li Rojava erka civaka Êzidî ye û ev bang kir: “Dema ku DAIŞ'ê êrişî Şengalê kir û dayik û xwişkên me ketin destê wan hovan, gelê me yê Rojava bi hawara me hat. Tiştek nema ku ji me re nekirî. Min bi xwe şahidiya fermanê kir. Rojavayiyan em di malên xwe de hewandin, her tişteke pêwîst ji me re kirin. Cilên li ser xwe dan me, cilên li ser zarokên xwe dan zarokên me. Xwarina xwe dan me. Min bi xwe bi çavên xwe dît. Civaka Êzidî jî îro ji ber wê seferber bûye. Tu ferq û cudahî di navbera me û Rojava de nîne. Bangawaziya min ji civaka me ya Êzidî heye ku çi ji destê wan bê ji bo Rojava bikin. Niha di vê zivistanê de li ber wê sermayê li ber xwe didin. Îro pêdiviya Rojava bi me heye. Demekê jî pêdiviya me bi wan hebû. Bila herkes rabe ser pêyan û alîkariyê bide Rojava.”
MA / Zeynep Durgut