Li gundê Bîrtawa yê Artûklû ya Mêrdînê, di 18'ê Çileya 2024'an de ji nmazetên keyatiyê yek jê bi hinceta hilbijêr hatine veguhastin, îtiraz kir. Piştî vê bi biryara Lijneya Hilbijartinê ya Navçeyê cendirme hatin gund. Piştî vê du malbat ketin qirika hev û şer çêbû. Gundî jî ji bo her du malbatan ji hev bikin, tevgeriyan lê dayika 5 zarokan Gulşen Çalişkan a 5 salî, bi derba darê ku li serê wê ket bi giranî birîndar bû. Gulşen Çalişkan a ku li Nexweşxaneya Perwerdehî û LÊkolînê ya Mêrdînê hat dermankirin, di 8'ê Hezîrana 2024'an de jiyana xwe ji dest da. Piştî vê lêpirsîn hat destpêkirin. 

 

NAVÊ KESÊ KU LÊXIST GOT

 

Di vê çarçoveyê de Gulşen Çalişkan a ku di 25’ê Çileya 2024’an de îfadeya wê hatibû girtin, dema ku hê li nexweşxaneyê dihat dermankirin, diyar kiribû ku piştî şer dîtiye çûye cihê bûyerê û dema xwestiye jinbira xwe ya li erdê rake derbek li serê wê ketiye. Gulşen Çalişkanê got: “Dema ku min xwest jinbira xwe ji erdê rakim, namzetê keyatiyê Muhîttîn Acar bi darê darê di destê xwe de li serê min xist. Ez bêhiş bûm û ketim erdê. Leşkerekî cendirme yê ku min navê wî nedizanî ez ji erdê rakirim û radestî birayê min kirim. Tu kesê din li min nexist."

 

 

Muhîttîn Acarê ku piştî îfadeya Gulşen Çalişkanê hat binçavkirin, îdia kir ku roja bûyerê dar di destê wî da tune bûye û lê bi şertê kontrola edlî hat berdan. Piştî mirina Gulşen Çalişkanê Acar di 8'ê Hezîranê de hat girtin û ew şandin girtîgehê. Di çarçoveya lêpirsînê de Acar, Karmendê Karên Derve M.M.B. û amîrê Cendirmeyan A.A wekî şahid îfade dan û îdia kirin ku di destê Acar de dar nedîtine û di 20'ê Îlona 2024'an de bi şertê kontrola edlî hat berdan.

 

Malbata Gulşen Çalişkanê diyar kir ku roja bûyerê efserê  M.M.B. û amîrê  Cendirmeyan A.A di dema bûyerê de ne li wir bûne, di dawiya bûyerê de hatin gund. 

 

Birayê Gulşen Çalişkanê Îbrahîm Çalişkan îşaret bi wê yekê kir ku her çend salek di ser bûyerê re derbas bûye jî di dosyeyê de tu pêşketin çênebûye û îdianame jî nehatiye amadekirin û bi bîr xist ku bersûc piştî 3 mehan hatiye berdan. Çalişkan da zanîn ku xwişka wî jiyana xwe ji dest daye lê ji ber vê kesekî girtî tune ye û got: “Tevî ku navê kiryar diyar bû jî, bi şertê kontrola edlî hat berdan. Ev rewşeke xemgîn e. Tevî ku gelek daxwaznameyên me hene jî hê îdianame nehatiye amadekirin. Vîdeo, wêne û qeydên me yên deng hene. Li gel vê jî îdianame nehatiye amadekirin. Divê dozger van li ber çavan bigire. Em dixwazin edalet demildest pêk were. Jiyana mirovekê li meydanê ye. Ji bo dozger amadekirina îdianameyê ne zehmet e. Sûcdar diyar e, kuştin û jiyana kesekî li holê heye."

 

MA / Ahmet Kanbal