RIHA - Nivîskar Mehemt Serhat Polatsoy bi îdiaya “telîsê bombeyê” demekê di girtîgehê de ma. Li Polatsoy 7 sal û 6 meh cezayê hefsê hate birîn û “rapora” dijîtal a ku dema Polatsoy girtî li ser yekî hatibû dîtin weke hinceta cezayê hat nîşandan.
Bi îdiaya “telîsê bombeyê” ku hat îdiakirin di 30’ê Nîsana 2013’an de li ser rêya Taxa Şevranê ya navçeya Pirsûs a Rihayê hatiye dîtin, der heqê nivîskar-rojnameger Mehmet Serhat Polatsoy, Dogan Sayin, Mehmet Ekrem Polatsoy, Şahîn Tanrikulu, Ahmet Geçgel, Muslum Halhalli û Ayhan Oruç de doz hatibû vekirin. Her 7 kes jî bi îdiayên “Xerakirina yekitî û yekparetiya dewletê”, “Endamtiya rêxistinê”, “Madeyên xetere li cem xwe girtine” û “Propagandaya rêxistinê” hatin darizandin. Di Gulana 2022’yan de jî biryar hate dayin.
HEM BERAET HEM JÎ CEZA
2’yemîn Dadgeha Cezayên Giran a Rihayê bi îdiaya “Endamtiya rêxistinê” 7 sal û 6 meh û ji îdiaya “Madeyên xetere bi xwe re gerandine” jî 5 sal û 6 meh û 20 roj cezayê hefsê û 25 hezar TL jî cezayê pereyan da Mehmet Serhat Polatsoy. Polatsoy, ji her du madeyên din beraet kir
Dadgehê, bi îdiaya “alîkariya çekan daye rêxistinê” li Mûstafa Ekrem Polatsoy, Dogan Sayin, Şahîn Tanrikulu û Muslum Halhalli jî 15 sal cezayê hefsê birî. Ahmet Geçgel û Ayhan Oruç ên ji hêman îdiayê dihatin darizandin jî beraet kir.
Daîreya 4’emîn a Dadgeha Edliye ya Herêma Dîlokê di 12’ê Kanûna 2022’yê de serlêdana parêzerên kesên tên darizandin red kir. Parêzerên dosyayê li ser vê yekê serî li Dadgeha Bilind dan. Daîreya Cezayan a 3’yemîn a Dadgeha Bilin jî cezayê bi îdiaya “Madeyên xetere li xwe gerandiye” li Mehmet Serhat Polatsoy hatibû birîn, betal kir. Dadgeha Bilind, cezayên ji îdiayên din hatibû birî jî erê kir.
Belgeyeke dijîtal a di hundirê hafizeya USB’ê de ku dema Polatsoy girtî li ser kesekî li derve hatibû bidestxistin, weke hinceta cezayê Polatsoy hate nîşandan. Nivîsa di belgeya dijîtal de weke “rapora rexnedayinê” ya Polatsoy hate qebûlkirin û weke hinceta cezayê hate nîşandan.
HEM ŞAHIDÊ NEPEN HEM YÊ AŞKERA YE!
Polatsoy, biryara Dadgeha Bilind nirxand û got: “Ev tiştên hatine jiyîn, komploya duyemîn e. 3 kesan têkildarî dosyayê îfade dane. Yek ji wan Mîdya Necîp e. Yê din Ayhan Oruç ê hatiya xistin e. Ayhan, hevalê min ê taxê bû. Hem bi navê xwe hem jî bi navê ‘Abuzer’ îfade da. Di danişîna ewil de Ayhan got; ‘îfadeya li emniyetê ne îfadeya min e.’ Her wiha got; ‘Şahidê nepen ê bi navê ‘Abuzer’ ez im. Psîkolojiya min xerab bû. Hemû îfadeyên min bi navê Ayhan û bi koda Abuzer dane derew in, xelet in. Ez tedawiya psîkolojîk dibim.’ Ez di danişîna Tebaxa 2014’an de hatim berdan. Tev li hemû danişînan bûm. Dadgeha Biklind, komploya Midûriyeta Emniyetê ya Rihayê vala derxist, teşhîr kir. Dadgeha Bilind ku di mijara teqemeniyan de komplo vala derxist, cezayê ‘endamtiya rêxitinê’ erê kir. Ji bo dayina vî cezayî xwe zêde daye zorê. Di biryara bihincet de dibêje ‘Rapora rexnedayînê ya ku dema di girtîgehê de bû nivîsandî...’ tê gotin.”
‘TU DELÎLÊN ŞÊNBER TUNE NE’
Polatsoy, bal kişand ser “rapora” behsa xeberê û wiha got: “Qaşo min li girtîgehê raporek nivîsandiye û ev rapor di kontroleke rêyê de ketiye destê hêzên emniyetê. Min tu raporên bi vî rengî nenivîsandine. Tişta ku weke delîl tê nîşandan, nivîsa min a dest nîne. Dev ji vê berde, tişta weke delîl tê nîşandan, daneyeke dijîtal e. Gelo ji daneyeke dijîtal çawa cezayê ‘endamtiya rêxistinê’ tê erêkirin? Hişê mirovî ranagire. Ez endamê tu rêxistinan nînim. Lê civaknasekî girêdayî afirînerê konfederalîzma demokratîk birêz Abdullah Ocalan û fikrên wî me. Ez, Kurdekî welatparêz û sosyalîst im.”
MA / Emrullah Acar