EDENE – Mehdî Ozdemîr, parêzerê girtiyê nexweş ê Hadî Elçîçek ê jiyana xwe ji dest da, diyar kir ku girtina muwekîlê wî tevî raporan û paşxistina înfazê ku pêvajoyê dirêj kirin, îhtîmala başbûnê ji holê rakirine û got: "Ev ne înfaz e, biryara mirinê ye." 

 

Hadî Elçîçek ê ji sedî 93 rapora wî ya astengdariyê hebû û ji bo dermankirinê înfaza wî 6 mehan hatibû taloqkirin, li Nexweşxaneya Perwerde û Lêkolînê ya Bajêr a Edeneyê ku ji ber nexweşîna pençeşêrê lê dihat dermankirin, jiyana xwe ji dest da. Elçîçek di 16'ê Sibata 1999'an de li navçeya Dihê ya Sêrtê hat girtin. Piştî 10 rojan di bin çavan de ma, Elçîçek bi îdiaya "xerakirina yekîtî û yekpareyiya dewletê" hat girtin. Bi heman îdiayç, Dadgeha Ewlehiya Dewletê ya Hejmar 1 (DGM) ya Amedê cezayê darvekirinê lê birî. Piştî rakirina cezayê darvekirinê, cezayê Elçîçek veguherî cezayê muebeta giran. 

 

Dadgeha Mafê Mirovan a Ewropayê (DMME), bi sedema ku endamên leşkerî di nava Dadgehên Ewlehiya Dewletê de hebûne, biryara "binpêkirina darizandina adil" da. Elçîçek ku 22 salan di girtîgehê de ma, piştî biryara binpêkirinê di 9'ê Kanûna 2021'ê de ji Girtîgeha Tîpa T a Tarsûsê hat berdan. Elçîçek ku darizandina wî ji nû ve dest pê kir, di vê demê de li Nexweşxaneya Perwerdehî û Lêkolînê ya Bajêr a Edeneyê hat dermankirin. Nexweşxaneyê ewilî rapora ji sedî 80'ê asteng e, da Elçîçek. Elçîçekê ku înfaza wî hat sekinandin û darizandina wî ji nû ve dest pê kir, li Dadgeha Cezayê Giran a 4'an a Amedê bi heman sûcdariyê cezayê muebeda giran lê hat birîn. Parêzeran îtiraz kir, lê tu encam ji îtirazê derneket. Piştî ku Daîreya Ceza ya 3'yan a Dadgeha Bilind ceza pesend kir, Elçîçek di 7'ê Çileya 2025'an de hat binçavkirin. Elçîçek ku li mala xwe ya li Mêrsînê hat binçavkirin, birin Girtîgeha Tîpa F a Kurkçuler a Edeneyê. Rewşa tenduristiya Elçîçek di 6'ê Sibatê de xirab bû û ji bo dermankirinê berdana wî 6  mehan hat taloqkirin. Elçîçek duh li nexweşxaneya lê dihat dermankirin Nexweşxaneya Perwerdehî û Lêkolînê ya Bajêr a Edeneyê jiyana xwe ji dest da. 

 

Lijneya Tenduristiyê ya Nexweşxaneya Perwerdehî û Lêkolînê ya Bajêr a Edeneyê, rapora ji 80 ya astengdariyê da Elçîçek. Piştî raporê parêzer Mehdî Ozdemîr, ji bo muwekîlê wî bê dermankirin serî li Serdozgeriya Komarê ya Edeneyê da. Dozgeriyê jî xwest Saziya Tiba Edlî têkildarî rewşa Elçîçek raporekê amade bike. Lijneya Îhtisasê ya 11'an a Saziya Tiba Edlî a Stenbolê, rapora "nikare di girtîgehê de bimîne" amade kir. Piştî rapora Saziya Tiba Edlî, Serdozgeriya Komarê ya Edeneyê di 6'ê Sibatê de înfaza Elçîçek ji bo 6 mehan taloqk kir. Piştî taloqkirina înfazê Elçîçek, li Nexweşxaneya Perwerdehî û Lêkolînê ya Bajêr a Edeneyê hat dermankirin. 

 

Nexweşxaneya Perwerdehî û Lêkolînê ya Bajêr a Edeneyê di 15'ê Gulanê de der barê rewşa Elçîçek de rapor amade kir û vê carê diyar kir ku rêjeya astengdariya wî ji sedî 93 ye. 

 

Piştî vê raporê, dozgeriyê ji Saziya Tiba Edlî rapora ku Elçîçek "dikare di girtîgehê de bimîne yan na" xwest. Lê berî ku rapor bê amadekirin rewşa Elçîçek xirab bû û jiyana xwe ji dest da. 

 

'NE BIRYARA ÎNFAZÊ, BIRYARA MIRINÊ BÛ'

 

Parêzerê Elçîçek Mehdî Ozdemîr, anî ziman ku daxwazên wan ên ji bo taloqkirina înfazê ji aliyê Saziya Tiba Edlî û dozgeriyan ve bêyî xwes bisipêrên pîvanên objektîf, bi awayekî pasîf esas hatine girtin û got: "Raporên tenduristiyê êdî wesfa xwe ya zanistî widna kirine. Girtiyên nexweş bi biryarên ji objektîfbûyînê dûr bi mirinê re rû bi rû tên hiştin. Ev ne înfaz bû, biryara mirinê bû." 

 

Ozdemîr destnîşan kir ku girtina di girtîgehê de ya girtiyên nexweş li dijî mafên mirovan ên sereke ne û got: "Divê hiqûqeke li ser esasê jiyana mirovan ku berdana van kesan û dermankirina wan esas digire, bê pêkanîn. Di pêkanînên edlî de jî esasgirtina nêzîkatiyeke mirovî û hiqûqî bivênevê ye." 

 

MA / Hamdûllah Yagiz Kesen