NAVENDA NÛÇEYAN - Hêzên Ewlekariya Hundirîn ên Bakur û Rojhilatê Sûriyeyê, li Kampa Holê li dijî hucreyên DAIŞ’ê operasyona “ewlehiyê” dan destpêkirin.
Hêzên Ewlekariya Hundirîn a Herêma Bakur û Rojhilatê Sûriyeyê, vê sibehê li Kampa Holê ya rojhilatê Hesekê yê Kantona Cizîrê operasyoneke ewlehiyê da destpêkirin. Ev operasyon, di çarçoveya rêzeoperasyonên ewlehiyê yên berê de hatiye destpêkirin ku Hêzên Ewlekariya Hundirîn bi hevkariya Hêzên Sûriyeya Demokratîk (HSD) û Yekîneyên Parastina Jin (YPJ) li dijî şaneyên DAIŞ’ê li kampa Holê pêk anîbûn.
Fermandariya Giştî ya Hêzên Ewlekariya Hundirîn a Bakur û Rojhilatê Sûriyeyê jî têkildarî operasyonê daxuyaniyek da. Daxuyanî li kampa Holê hat xwendin. Berdevka Yekîneyên Parastina Jin (YPJ) Rûksana Mihemed daxuyaniya bi Kurdî û nûnerê Fermandariya Hêzên Ewlekariya Hundirîn a Kantona Cizîrê Meen El Asî jî ya bi Erebî xwend.
Daxuyanî wiha ye:
“Bi berçavgirtina pirsgirêkên ewlehiyê yên di hundirê Kampa Holê de, hêzên me Hêzên Ewlekariya Hundirîn, Hêzên Ewlekariya Hundirîn a Jin a Bakur-Rojhilatê Sûriyeyê, û Yekîneyên Parastina Jin (YPJ, bi piştgiriya Hêzên Sûriyeya Demokratîk (HSD) û Koalîsyona Navneteweyî, destpêkirina qonaxeke nû ya Operasyona ‘Mirovî û Ewlehî’ radigihînin ku parastina niştecihên Kampa Holê û misogerkirina berdewamiya xebata ewle ya rêxistinên mirovî di hundirê kampê de armanc dike.
EM HEWL DIDIN TORÊN TERORÎST TÊK BIBIN
Kamp vê dawiyê şahidiya zêdebûneke ji êrişên şaneyên DAIŞ’ê re kiriye, ku zêdetirî 30 caran êriş li dijî xebatkarên mirovî pêk anîne, avanî û saziyên xizmetguzariyê sabote dikin, jiyana bi hezaran sivîlan xistine xetereyê û hewldanên alîkarî û îstîqrarê asteng dikin. Li ser vê bingehê, ev operasyon hewl dide ku torên terorîst ji hev bixîne, hêmanên ku hewl didin bandora xwe ji nû ve bi cih bînin bişopîne, rêxistinên mirovî û karmendên wan biparêze, û bi xurtkirina bernameyên hişyariyê û piştgiriya psîkososyal pêşî li îstismara zarokên ku wekî Şêrên Xîlafetê (Eşbal El Xîlafe) têne zanîn, bigire.
Agahiyên di destên me de nîşan didin ku DAIŞ heya niha hewldanên xwe yên îstismarkirina komên herî lawaz ên di nav kampê de dike. Bi alîkariya hin jinên ku bi komê ve girêdayî ne, DAIŞ îdeolojiya xwe ya tundrew di nav ciwan û zarokan de belav dike, da ku nifşek nû ji kesên ku ji hêla DAIŞ’ê ve îlham girtine, ku bi navê ‘Şêrên Xîlafetê’ têne binavkirin, mezin bike. Ev hewldan zarokan bi îdeolojiya terorîstî îndoktrîne dikin, pratîkên tundrew di nav kampê de ferz dikin, ciwanan teşwîq dikin ku tundîtiyê qebûl bikin û rêxistinên mirovî hedef bigirin. Ev yek gefê li pêşeroja van zarokan dixwe û hewldanên aramî û alîkariyê têk dibe.
Her wiha armanc ji vê operasyonê ew e ku bi parastina saziyên mirovî ji her hewldanek sabotajê, ewlehî û aramiya xizmetguzariyê xurt bike, di heman demê de hevrêzî û hevkariya di navbera hêzên ewlehiyê, alî û saziyên mirovî û civaka herêmî de ji bo astengkirina terorê û çavkaniyên wê zuha bike.
Operasyona ‘Mirovî û Ewlehî’ qonaxek nû temsîl dike di rêzeoperasyonên ewlehî û mirovî de ku hêzên me di salên borî de li kampa Holê dest pê kirine, ku beşdarî sînordarkirina çalakiyên şaneyên DAIŞ’ê û dabînkirina jîngehek ewletir dibin. Ev qonax pabendbûna me ya domdar ji bo şerê li dijî terorê û parastina sivîlan, di heman demê de pêşxistina rêbazên operasyonel ji bo çareserkirina pirsgirêkên ku derdikevin, tekez dike.
EWLEHIYA MIROVAN JI BO ME XETA SOR E
Em wek, Hêzên Ewlekariya Hundirîn a Jin ên Bakur-Rojhilatê Sûriyeyê, Hêzên Ewlekariya Hundirîn û Yekîneyên Parastina Jin (YPJ), diyar dikin ku ewlehiya mirovan xeta sor e, û parastina kampê ji terorê şertek pêşîn e ku, ji bo misogerkirina berdewamiya alîkariya mirovî û afirandina hawîrdorek aram û bi ewle ji bo hemû niştecihên heremê."