Li navçeya Cizîrê ya Şirnexê Komeleya Birca Belek a Ziman û Çandê têkildarî destpêkirina serdema  perwerdehiyê ya sala 2023-2024’an daxuyanî da çapemeniyê. Rêveberên rêxistinên Partiya Çepên Kesk, DBP, HDP, endamên Meclisa Dayikên Aştiyê, aktîvîstên TJA’yê beşdarî daxuyaniyê bûn. Di daxuyaniyê de pankarta “ Zimanê me rûmeta me ye, em perwerdehiya bi zimanê xwe dixwazin, çand û zimanê me giyana me ye” hate vekirin. Her wiha dovîzên “ Divê kurdî bibe zimanê fermî” hatin rakirin.

 

BI MÎLYONAN ZAROKÊN KURD JI PERWERDEHIYA ZIMANÊ DAYIKÊ BÊPAR IN’ 

 

Daxuyanî ji aliyê Hevserokê Komeleya Birca Belek Cahît Akil ve hate xwendin. Akil diyar kir ku zarokên kurd îsal jî bi zimanê xwe bêpar dest bi serdema perwerdehiyê ya nû dikin û wiha got: “Li Tirkiyeyê serdema perwerdeyê ya 2023-2024an dest pê dike. Destpêkirina vê serdema perwerdeyê ji bo zarokên Kurdan jî derbasdare.Li gorî xala 42’yemîn a zagona bingehîn a Tirkiyeyê,li dibistanên dewletê ji bilî zimanê tirkî bi tu zimanê dayikê perwerde nikare were dayîn. Ev jî tê wê wateyê ku mîna sedsalên borî yên Komara Tirkiyeyè dîsa li ser bi mîlyonan zarokên kurdan perwerdehiya bi zimanê tirkî were ferzkirin û zarokên kurdan dîsa ji Mafê perwerdehiya zimanê dayikê bêpar bê hiştin. Bi vî şêwazî bi mîlyonan zarokên kurd ji zimanê xwe û çanda xwe bên dûrkirin. “

 

‘DIVÊ QANÛN JI KURDAN RE JÎ DERBASDAR BIN’ 

 

Akil bi lêv kir ku gelê kurd bi salane daxwaza bi zimanê dayikê perwerdehiyê dike û got: “Gelê kurd ji destpêka avabûna Komara Tirkiyeyê heta niha bi vê helwest û nêzikatiya pişaftin, inkarkirin û tune hesibandinê re rû bi rû maye. Daxwaza gelê kurd daxwaza perwerdehiya zimanê dayikê ye. Ev daxwazeke însanî ye. Di hemû peyman û danezanên navneteweyî û gerdûnî de ev maf, wek mafekî bingehîn jibo hemû gel û neteweyan hatiye qebûlkirin û ev peyman ji bo gelê kurd jî derbasdar be.”

 

Daxuyanî bi berzkirina dirûşmeya “ Bê ziman jiyan nabe” bi dawî bû.