RIHA - Martîna Florîo ya ji Îtalyayê tevlî meşa 4 rojan a Meclîsa Ciwanan a DEM Partiyê ya ji Amedê heta Amarayê bû got, "Abdullah Ocalan rêya divê em bimeşin nîşanî me dide. Ev rêya mirovên ji azadî, mirovahî, rojên bedew, demokratîk û aştiyane bawer dikin e."
Meşa ku ji aliyê Meclîsa Ciwanan a Partiya Wekhevî û Demokrasiyê ya Gelan (DEM Partî) ve di 1 'ê Nîsanê de li Qada Şex Seîd a Amedê bi dirûşma, "Em bi Civaka Demokratîk ber bi Azadiyê ve Dimeşin" destpê kir, duh li gundê Amara ya navçeya Xelfetî ya Rihayê ku Rêberê Gelê Kurd Abdullah Ocalan lê ji dayik bûye, bi dawî bû. Meşa bi pêşengiya ciwanan a bi wesîleya 76 saliya Abdullah Ocalan hat lidarxistin, bi hezaran kes beşdar bûn. Ji xeynî Tirkiye û Kurdistanê ciwanên enternasyonal jî beşdarî meşê bûn.
'LI VIR BÛYÎN FERSENDEKE MEZIN E'
Martîna Florîo ya Îtalyayî ku di meşe de cih girt got ku weke jineke ciwan hatina vê derê ji bo wê fersendeke gelekî girîng bû û wiha axivî: “4'ê Nîsanê rojeke kêfxweşiyeke gelekî bedew e. Her der rengîn e û enerjîyeke pir xweşik heye. 4 'ê Nîsanê ne tenê ji bo civaka Kurd, ji bo her kesên ji nirxên mirovahiyê bawer dikin rojeke gelekî girîng e. Ji ber vê yekê min li vir bûyîna xwe weke firsendeke mezin dibînim."
Martina Florio diyar kir ku gotinên Abdullah Ocalan ne tenê gelê Kurdistanê li hemû cîhanê gihaye û wiha got: "Gotinên wî li ser hemû gelan girêdayê hev in. Weke mirovên li Ewropayê dijîn û bi taybetî jî ciwan, em bi pêşengiya civak û mirovahiyê bawer in. Abdullah Ocalan rêya meşê nîşanî me dide. Ev rê ji bo kesên ku baweriya wan bi azadî, mirovahî, rojên xweş, demokratîk û aştiyane heye.”
'BAWERIYA ME YA TAM HEYE KU EM Ê BI SER BIKEVIN'
Martîne Florîo got ku di dema meşê de ew bûne şahidê potansiyela ciwanan û wiha axivî: "Di dema êrîşan de em bûn şahid ku civakê çawa ciwan parastine. Mesela rojek berê dema me êrîşî ciwanan dikir malbat, dayik, leşker bi me re bûn. Di heman demê de min baweriya ciwanan dît ku wê bi ser bikevin. Baweriya me ya tam heye ku em ê bi ser bikevin. Peyama herî girîng a divê em di dilê xwe de bihêlin ev bû."
'PEYAMÊ XITABÎ DILÊ ME KIR'
Martîna Florio peyama Abdullah Ocalan a ji bo ciwanan bi bîr anî û bal kişand ser girîngiya gotinên Abdullah Ocalan û wiha got: " Mesaja ku me bihîst, xitabî dilê me kir. Em dizanin ku ji bo jiyana me weke sosyalîstekê avakirin û jiyîn çiqasî girîng e. Mesele ev e. Eger em bi civakê ve girêdayî bin, wê her tişt baş bibe. Ji ber vê yekê divê em vê meşa xwe bidomînin.”
MA / Ceylan Şahînlî – Fethî Balaman