ENQERE - Hevserokên Giştî yên DEM Partiyê Tûncer Bakirhan û Tulay Hatîmogullari serdana Hevserokê Giştî yê HDP’ê yê berê û Selahattîn Demîrtaş kirin û ji bo tevkariyê li pêvajoya aştiyê bikin divê rêya wan bê vekirin. 

 

Hevserokên Partiya Wekhevî û Demokrasiyê ya Gelan (DEM Partî) Tûncer Bakirhan û Tulay Hatîmogullari duh li Girtîgeha Kandira ya Kocaeliyê serdana Fîgen Yuksekdag û Semra Guzel kirin û îro jî li Girtîgeha Edîrneyê serdana Selahattîn Demîrtaş û Selçûk Mizrakli kirin.

 

Tûncer Bakirhan piştî serdanan li pêşiya Girtîgeha Edirneyê daxuyanî da. Bakirhan diyar kir ku moral û rewşa tenduristiyê ya girtiyan baş e û wiha got: “Pêşniyazên pir hêja kirin. Diyar kirin ku ew ê ji bo pêşveçûna vê pêvajoyê erk û berpirsyariya ku dikeve ser milê wan bi cih bînin.”

 

Bakirhan wiha dirêjî da axaftina xwe: “Ew nikarin bînin ser ziman, lê em tînin ser ziman. Di pêvajoyeke wiha de ku em aştiyê nîqaş dikin û çek bi merasîmê hatin danîn, kesên di Doza Kumpasê ya Kobanê de tên darizandin; Selahattîn Demîrtaş, Fîgen Yuksekdag û hevalên me yên din, divê di vê pêvajoyê de li gel me bin. Ji bo meşandina vê pêvajoyê pêwîstiya me bi wan heye.”

 

Bakirhan bal kişand ser biryara binpêkirinê ya Dadgeha Mafên Mirovan a Ewropayê (DMME) ya derbarê Selahattin Demîrtaş de û wiha got: “Ji bo ku ev pêvajo baştir were rêvebirin, bi li ber çav girtina biryara DMME’yê divê hevalên me yên di Doza Kumpasê ya Kobanê de tên darizandin werin berdan.”

 

Tulay Hatîmogullariyê jî destnîşan kir ku ew di pêvajoyeke ku çek bêdeng dimin û zimanê aştiyê bilind dibe de ne û wiha got: “Li gel van hemûyan, em di nava pêvajoyeke ku avakirina aştî û civaka demokratîk nîqaş dikin de ne. Di pêvajoyeke wiha de helbet em jî di wê baweriyê de ne ku encamake bi lez pêk were. Ev yek wê civaka Tirkiyeyê, tirk, kurd, laz, çerkes û gelê me yê ji 72 neteweyan pir kêfxweş bike.”