Li gorî rapora Şaxa ÎHD’a Amedê, di sala 2024’an de li bakurê Kurdistanê herî kêm 7 hezar û 431 binpêkirinên mafan hatin jiyîn û mafê jiyanê yê 117 sivîlan hate binpêkirin.
Li 3 girtiyên sewqî Girtîgeha bi Ewlekariya Bilind a Erzînganê hatine kirin, lêgerîna tazî hate ferzkirin. Girtiyên ku ji bo protestokirina sepanê greva birçîbûnê dane destpêkirin, xistin hucreyê.
Endamê PM’a DEM Partiyê Muhsîn Aydogdu ku li Rihayê hatibû binçavkirin, hate berdan.
Şandeya DBP û DEM Partiyê hevdîtinên xwe yên li Bakur û Rojhilatê Sûriyeyê didomînin. Şandeyê, bi Hevseroka Daîreya Karên Derve ya Rêveberiya Xweser Îlham Ehmed re hevdîtin kir.
Li lîstikvanê Çorum FK’ê Burak Suleymanoglû ku di maça Amedsporê de hereketên zayendperest kiribû, 4 maç ceza hate birîn.
Korgeneral Yaroslav Moskalik di êrişa bombeyî ya li Moskovê de jiyana xwe ji dest da.
Rêxistinên hiqûq û civaka sivîl ên li Wanê rapora xwe ya têkildarî 9 girtîgehan aşkera kirin. Di raporê de hate gotin ku girtî nikarin ji gelek mafên xwe sûd bigirin û hat xwestin ku Lijneyên Îdare û Çavdêriyê yên tehliyeyên girtiyan bêyî hincetek hebe asteng dikin bên girtin.
Platforma "Şiyar Be! Platforma Tekoşîna Li Dijî Tiryakê" dê sibe meşekê li dar bixe û damezirandina xwe ragihîne. Hevberdevkê Platformê Mûrat Kan, got; “Gotineke her kesî li dijî tiryakê heye” û banga tevlibûna meşê kir.
Li Kutahyayê bi pileyên 4.5 û 4.6’ê du erdhej çêbûn. Piştre jî li du navçeyan li dibistanan navber dan perwerdeyê.
Sibe dê li Qamişloyê bi beşdariya zêdetirî 400 delegeyan “Konferansa Yekrêzî û Yekhelwesta Kurdî li Rojavayê Kurdistanê” were lidarxistin.
Malbat û wasiyê Rêberê Gelê Kurd Abdullah Ocalan ji bo hevdîtinê serî li Serdozgeriya Komarê ya Bursayê û Midûriyeta Girtîgeha Îmraliyê dan.
Ji 5 zarokên Mehmet û Muzeyyen Kavakê 2’yan jê jiyana xwe ji dest dan û 3 zarokên wan jî bi nexweşiyê ketine. Hevjînan, ji bo rizgarkirina keça xwe ya 14 salî ku bijîşk dibêjin “3 meh emrê wê ma ye”, banga alîkariyê li bijîşkan kirin.
Danişîna 2’yemîn a 15 kesên di cînayeta Narîn Guranê de ji ber sûcê “sûcdar veşartine” tên darizandin, dest pê kir.
Qeyûmê Êlihê, ji bo ku di tedbîrên teserûfê de asê nemîne, 4 milyon û 483 hezar TL ji bo Festîvala Qehwe û Çîkolatayê ya ku di 23'ê Nîsanê Cejna Zarokan de li dar xist xerc kir. Qeyûm îhaleyê da Organîzasyona HBS'ê ku di heyama qeyûmê de bi milyonan pere qezenc kiribû.
Parêzer Servet Ozen diyar kir ku divê sererastkirinên qanûnî yên têkildarî “Mafê hêviyê” tavilê bên kirin û got: “Hewceye pozîsyona birêz Ocalan ji hêla qanûnî ve bê misogerkirin û her tim weke şantaj neyê bikaranîn.”