AMED - DFG'ê derbarê erêkirina cezayê 7 rojnamegeran ji aliyê Dadgeha Îstînafê ve bertek nîşan da da û diyar kir ku rexmê cezayan dê rojnameger heqîqetê binivisînin.

 

Komeleya Rojnamegeran a Dîcle Firatê (DFG), li ser hesabê xwe yê medyaya dijîtal X’ê derbarê biryara Dadgeha Edlî ya Herêma Enqereyê ya li ser dosyaya ku 11 rojnameger tê de dihatin darizandin û cezayê 6 sal û 3 meh ê girtîgehê yê li nûçegihanên Ajansa Mezopotamya (MA) Dîren Yurtsever, Selman Güzelyuz, Emrullah Acar, Zemo Aggoz, Mudira Nûçeyan a JINNEWS’ê Oznur Deger û rojnamevan Denîz Nazlim û Hakan Yalçin hatiye birîn, daxuyaniyek da.

 

DFG’ê di daxuyaniya xwe de destnîşan kir ku erêkirina biryarê xelekeke êrişên ku di demên dawî de li dijî azadiya çapemeniyê ye û ev tişt got: “4’emîn Dadgeha Cezayê Giran a Enqereyê bi îdiaya ‘Endamtiya rêxistinê’ 6 sal û 3 meh cezayê hefsê li nûçegîhana Ajansa Mezopotamyayê (MA) Dîren Yurtsever, Midûra Nûçeyan a JINNEWSê Oznûr Deger, Şefê Buroya MA’yê ya Enqereyê Selman Guzelyuz, nûçegihanên MA’yê Emrûllah Acar û Zemo Aggoz Yîgîtsoy û rojnameger Hakan Yalçin û Denîz Nazlim birîbû. Ev ceza ji aliyê 22’yemîn Daîreya Ceza ya Dadgeha Herêmî ya Enqereyê (Dadgeha Îstînafê) hate pejirandin. Cezayê rojnameger Bêrîvan Altan ku di heman dosyayê de ceza lê hatibû birîn jî hate xerakirin. 

 

Pejirandina cezayan a ji aliyê Dadgeha Îstînafê ve xelekeke êrişên ku di demên dawî de li dijî azadiya çapemeniyê zêdebûne. 4’emîn Dadgeha Cezayê Giran a Enqereyê bêyî ku delîlek hebe tenê ji ber xebatên rojnamegeriyê bi awayekî bêhiqûqî li hempîşeyên me ceza birî. 22’yemîn Daîreya Cezayê jî bi pejirandina van cezayan rê li ber vê bêhiqûqiyê vekir. 

 

Pejirandina cezayan hem êrîşa li ser azadiya çapemeniyê ye û hem jî darbeyeke li atmosfera demokratîkbûyînê ya ku li Tirkiyeyê di rojevê de ye. Ev biryara ku berovajiyê ruhê pêvajoyê ye, divê ji aliyê hikûmeta AKP’ê ve bê ravekirin. 

 

Hempîşeyên me yên ku cezayên wan hatine pejirandin, tevî hemû zextan jî rojnamegeriya xwe didomînin. Ev yek jî ji feraseta ku ceza li hempîşeyên me birîye re bûye derdekî mezin. Em van cezayên bêhiqûqî qebûl nakin, em ê têkoşîna hiqûqî ya hempîşeyên xwe veguhêzin dadgeha jortir. Em ê tevî cezayan jî nivîsîna heqîqetan bidomînin. 

 

Komeleya Rojnamegeran a Dîcle Firatê”